https://drive.google.com/drive/folders/0B_WZxntPdha3fmdlRWxLZFl2UzhGZWM0WWZ4SlNqSDIwZjYyaFRucjNEbmFFVmI4SHpLSjg?usp=sharing
മീഡിയ അക്കാഡമിയും
ജാതിപ്പിള്ളയുടെ " ചുരുട്ടിയ മുഷ്ടി " യും
_____________________________________
ആര്. എസ്. ബാബു എന്ന പത്രപ്രവര്ത്തകന് തന്റെ ഇഷ്ടപ്പടി ആരെക്കുറിച്ചും സ്തുതിപാഠനമെഴുതാം . പക്ഷെ , അതൊക്കെ സ്വന്തം പത്രമായ " ദേശാഭിമാനി " യിലോ മറ്റു സ്വകാര്യ പത്രങ്ങളിലോ മാത്രമേ പാടുള്ളൂ ( അങ്ങനെ ഒരിക്കല് , മുഖ്യമന്ത്രി ഇ . എം. എസ്. നമ്പൂതിരിപ്പാട് 1958-ല് നടത്തിയ പിന്നാക്ക സംവരണപരമായ ജനവഞ്ചനയെ വരെ , ദേശാഭിമാനിയില് സ്തുതിപാഠന പരമ്പരയെഴുതി വെളുപ്പിച്ചെടുക്കാന് യത്നിച്ചു ടിയാന് . അതിനെ , പഴുതില്ലാത്ത ഒരു ലേഖന വിചാരണയിലൂടെ 2000-ല് ഞാന് തുറന്നുകാട്ടുകയായിരുന്നു . ) എന്നാല് , ഒരു സര്ക്കാര് പത്രത്തില് അത്തരം നുണപ്രചാരണം നടത്താന് ബാബുവിന് അവകാശമില്ല . താന് ചെയര്മാനായിരിക്കുന്ന കേരള മീഡിയ അക്കാഡമിയുടെ മുഖപത്രമായ " മീഡിയ " മാസികയുടെ 2019 ഏപ്രില്-മേയ് ലക്കത്തിലെ എഡിറ്റോറിയലിലാണ് ബാബുവിന്റെ പ്രചാരണ സാഹിത്യം വിളങ്ങുന്നത് . പത്രത്തിന്റെ എഡിറ്റര് - ഇന് - ചീഫ് കൂടിയാണ് അദ്ദേഹം . മൂവായിരത്തോളം മാധ്യമ പ്രവര്ത്തകരും ആയിരത്തോളം മാധ്യമ വിദ്യാര്ത്ഥികളും പങ്കാളികളായ സംരംഭം " എന്ന് അദ്ദേഹം വിശേഷിപ്പിക്കുന്ന , കേരളാടി സ്ഥാനത്തില് നടത്തിയ " മാധ്യമ ചരിത്രയാത്ര " യെപ്പറ്റിയുള്ളതാണ് എഡിറ്റോറിയല് . അതില് , സ്തുതിപാഠനത്തിന്റെ ഉച്ചസ്ഥായിയായി അദ്ദേഹം എഴുതുന്നു : " മലയാള മാധ്യമ രംഗത്തെ ചുരുട്ടിയ മുഷ്ട്ടിയായ സ്വദേശാഭിമാനി രാമകൃഷ്ണപിള്ളയുടെ നാമം ഒരിക്കലും അസ്തമിക്കുന്നതല്ല . "
**** എന്നാല് , അയിത്തജാതിക്കാര്ക്കു മേലെയാണ് ആ മുഷ്ടി വന്നു പതിച്ചിരുന്നതെന്ന് ഒട്ടേറെ എഴുത്തുകാര് കുറെ കാലമായി കേരളീയ സമൂഹത്തോടു സംവദിക്കുന്നുണ്ട് . ഞാനും കാല് നൂറ്റാണ്ടായി അതുതന്നെയാണു ചെയ്യുന്നത് . ഏറ്റവും ഒടുവിലായി 17.9.2018 - ന്റെ സമകാലിക മലയാളം വാരികയിലാണ് പിള്ളയുടെ ജാത്യന്ധതയുടെ ഭീകര മുഖം ഞാന് തുറന്നുകാട്ടിയത് ( അതടക്കം എന്റെ മിക്ക നിരൂപണങ്ങളുടെയും ലിങ്ക് ഇവിടെ ചേര്ക്കുന്നു https://drive.google.com/drive/folders/1JWexC5g4454ULqbeG5-uU57zeSr0hrlK?fbclid=IwAR1PiyCrs4CBUTZvOKiDdLTC0EYmC-10t650XTYk4wzpnpttNTsnmJCAxIg ) . എന്റെ ഇത്തരം ചോദ്യംചെയ്യലുകള് അടിസ്ഥാനരഹിതമാണെന്നു തെളിയിക്കാന് പിള്ളഭക്തരോ മറ്റാരെങ്കിലുമോ രംഗത്തുവന്നിട്ടില്ല ഇന്നോളം . ഒരു കേസ് കൊടുത്തിട്ടോ , എന്തിന് , ഒരു കുറിപ്പുകൊണ്ടെങ്കിലും എന്റെ വസ്തുനിഷ്ഠ പ്രത്യാഖ്യാനങ്ങളെ ചെറുക്കാന് ത്രാണിയില്ലാത്ത പിള്ളഭക്തര് വേറൊരു സൂത്രവിദ്യയാണ് ഇപ്പോള് സ്വീകരിച്ചിരിക്കുന്നത് : പത്രക്കടകളില് നിന്ന് പൊതുജനങ്ങള്ക്കു വാങ്ങാന് കിട്ടാത്ത ചില പ്രസിദ്ധീകരണങ്ങളില് തങ്ങളുടെ സ്തുതിപാഠന - പ്രചാരണ സാഹിത്യങ്ങള് എഴുതിവിടുക . അപ്പോള് , എന്നെപ്പോലുള്ള വിമര്ശകരുടെ കണ്ണില്പ്പെടാതെതന്നെ അവാസ്തവ ആഖ്യാനങ്ങള് ഭക്തരുടെ കൈയിലെത്തിക്കാനാവും ! പൊതുജനങ്ങള്ക്ക് എളുപ്പം കടന്നുചെല്ലാവുന്ന പൊതുപത്രങ്ങളിലാണു നുണകള് എഴുതുന്നതെങ്കില് , ഉറപ്പായും കിട്ടും തിരിച്ചടി ഉടന് . ടി. വേണുഗോപാലന് , പി. കെ . രാജശേഖരന് , എം . ജി . രാധാകൃഷ്ണന് , ഡോ : കെ. എം. സീതി , ആര് . സുനില് തുടങ്ങിയവര്ക്കു പരിചയമുണ്ട് എന്റെ മറുപടികള് .
**** ഇത്ര വിപുലമായി , ഇത്ര രൂക്ഷമായി , അടിസ്ഥാന രേഖകള് നിരത്തിവച്ചുതന്നെ ജാതിപ്പിള്ളയുടെ വ്യാജ പുരോഗാമിത്വത്തെ ഞാന് തുടര്ച്ചയായി തുറന്നുകാട്ടിയിട്ടും , ആ വംശമേന്മവാദിക്ക് " മലയാള മാധ്യമ രംഗത്തെ ചുരുട്ടിയ മുഷ്ട്ടി " യെന്ന കിരീടം ചാര്ത്തിക്കൊടുക്കുന്ന നമ്മുടെ സര്ക്കാര് വക പത്രാധിപ പ്രമാണിക്ക് എന്തു തരം ചങ്കൂറ്റമാണുള്ളത് ! വസ്തുനിഷ്ഠത എന്നത് ആയുധവും ആശയവും വഴികാട്ടിയുമായിരിക്കേണ്ട തൊഴിലാണു മാധ്യമപ്രവര്ത്തനം . സ്തുതിപാഠനമല്ലാതെ എന്തു വസ്തുനിഷ്ഠതയാണ് ഈ " ചുരുട്ടിയ മുഷ്ട്ടി " പ്രയോഗത്തിലുള്ളത് ? വാര്ത്തയധിഷ്ഠിത പത്രമെഴുത്തില് , കിരീടം വച്ച വംശീയവാദിയും മഞ്ഞപ്പത്രക്കാരനും അല്ലായിരുന്നു പിള്ള എന്നു തെളിയിക്കാന് കഴിയുമോ നിങ്ങള്ക്ക് ? ദിവാന്റെ തുണിയുടുക്കല് വരെ നീളുന്ന അശ്ലീലമെഴുത്തും മറ്റ് അവാസ്തവ ജല്പനങ്ങളുമല്ല നാടുകടത്തലിനു വഴിവച്ചത് എന്നു വിശദീകരിച്ചുതരാമോ ? ജാതിപ്പിള്ളയ്ക്കു കൊള്ളരുതാത്തവനായിരുന്ന അതേ ദിവാന് പി. രാജഗോപാല ചാരി ജോലിയൊഴിഞ്ഞു പോകുമ്പോള് , തിരുവിതാംകൂറിന്റെ തലസ്ഥാനം തൊട്ടു കൊച്ചി രാജ്യത്തിന്റെ വടക്കേ അതിര്ത്തി വരെ അടിത്തട്ടു ജനസമൂഹങ്ങള് നീളേ നിരന്നുനിന്നു നല്കിയ വിടവാങ്ങലിന്റെ അര്ഥം വിശദീകരിക്കാനാവുമോ ഭക്തര്ക്ക് ? അന്നു മറ്റു പത്രങ്ങള് നടത്താഞ്ഞ എന്ത് അഴിമതിവിരുദ്ധ പോരാട്ടമാണു ജാതിപ്പിള്ള നടത്തിയത് എന്നു പറഞ്ഞുതരാമോ ? പുരോഗമന കൊടിയടയാളമായ മാര്ക്സിന്റെ ജീവിതചരിത്രം വരെ പ്രസിദ്ധീകരിച്ച ശേഷമാണ് പണ്ഡിറ്റ് കറുപ്പനെ ജാതിപറഞ്ഞ് ഇകഴ്ത്തിയത് എന്നതല്ല ചരിത്രം എന്നു തെളിയിക്കാനാവുമോ ? ..... നിരവധിയാണ് അപ്പാര്തീഡ് പിള്ളയുടെ വിക്രിയകള് .
***** ഏതു കക്ഷിയുടേതായാലും കേരള ഭരണകൂടത്തെ എല്ലാ കാലത്തും നിയന്ത്രിക്കുന്നത് സവര്ണരുടെ സാമൂഹികവിരുദ്ധ താത്പര്യങ്ങളാണ് . അങ്ങനെയാണ് , യുദ്ധക്കുറ്റവാളിയെപ്പോലെ പൂര്വകാല പ്രാബല്യത്തോടെ വിചാരണചെയ്യേണ്ട വംശവെറിയനായ പിള്ളയെ പുരോഗമനവാദിവേഷം കെട്ടിച്ച് അവര് എഴുന്നള്ളിച്ചുകൊണ്ടിരിക്കുന്നത് . പക്ഷെ , ദലിതരുടെ സ്കൂള് പ്രവേശ പോരാട്ട കാലത്ത് അവര്ക്കെതിരെ സ്വന്തം പത്രത്തില് വംശവിദ്വേഷം അച്ചടിച്ചു പ്രചരിപ്പിച്ച് , അവരെ ജാതിവെറിയന്മാര്ക്കു മുന്നിലേയ്ക്കു വലിച്ചെറിഞ്ഞുകൊടുത്ത പിള്ളയുടെ പ്രതിമയോടു സഹിഷ്ണുത കാട്ടാന് ഏറെക്കാലം കഴിയുമോ , വെങ്ങാനൂരിന്റെ സ്വന്തം തിരുവനന്തപുരത്തിന് ? സാധുജനങ്ങള്ക്കു ദുരിതജീവിതം സമ്മാനിച്ച ആ കുറ്റവാളിയെ ന്യായീകരിക്കാന് പേനയുന്തുന്ന വല്ല സ്തുതിപാഠകനും രക്ഷപ്പെടുമോ ആ ജനരോഷത്തില്നിന്ന് ? പൊതുപണം ധൂര്ത്തടിച്ചു പിള്ളപ്പുസ്തകങ്ങള് എമ്പാടും അച്ചടിച്ചു വിടുന്ന കേരള ലൈബ്രറി കൗണ്സിലിലെ എട്ടുവീട്ടില് പിള്ളപ്പിന്ഗാമികള് വാക്കൈപൊത്തിനിന്നു പിഴമൂളേണ്ടി വരില്ലേ കേരളനാടിനോട് ?