നന്ദികേടിന്റെ ഗോശ്രീ പാലങ്ങള്
_____________________________________
വൈപ്പിന് പാലങ്ങള് നിര്ദേശിച്ചത് , നവോത്ഥാനകാലത്തിന്റെ പ്രിയനായ ധിക്കാരി സഹോദരനയ്യപ്പനാണെന്നതു ശരി . ആ മഹനീയ നാമം പാലങ്ങളില് ഓര്മിക്കപ്പെടുകയും വേണം . എന്നാല് , ഈ മൂന്ന് പാലങ്ങള് കൂട്ടിയോജിപ്പിക്കുന്ന നാലു കരകളില് മൂന്നെണ്ണത്തിലും , ആധുനിക കേരളത്തിന്റെ അഭിമാനപാത്രങ്ങളായ മറ്റു സാമൂഹിക പോരാളികളും ജീവിച്ചിരുന്നു അക്കാലത്ത് എന്നത് മറന്നുകൂടാ ; ആ മറവി ചരിത്രത്തോടു കാണിക്കുന്ന നന്ദികേടാണ് .
വൈപ്പിന്കരയില്ത്തന്നെ , നായരമ്പലത്ത് , സഹോദരന്നും മുന്പേ സാമൂഹിക വിപ്ളവ മുദ്രാവാക്യമുയര്ത്തിയ ചോതി ചാത്തനുണ്ട് . കേരളത്തിലെ അറിയപ്പെടുന്ന ആദ്യ ദലിത് എഴുത്തുകാരനാണ് , " ആദി പുലയ കവി " എന്നു ഭാഷാപോഷിണി മാസിക ഒരു നൂറ്റാണ്ടു മുന്പേ വിശേഷിപ്പിച്ച , നാടുനീളേ സാമൂഹികവിപ്ളവ ഗാനങ്ങള് പാടിനടന്നിരുന്ന ചോതി ചാത്തന് . കൊച്ചി രാജ്യത്തെ ആദ്യ ദലിത് നായക പോരാളിയായ കൃഷ്ണേതി ആശാനും , കൊച്ചി നിയമസഭയിലെ ആദ്യ ദലിത് പ്രതിനിധിയും പണ്ഡിറ്റ് കറുപ്പന് കവിതയിലെ " ചാഞ്ചന്കുട്ടി " യുമായ പി . സി . ചാഞ്ചനും മുളവുകാട്ടുകാരാണ് . കൊച്ചി നിയമസഭയേയും ഇന്ഡ്യന് ഭരണഘടനാനിര്മാണസഭയേയും ത്രസിപ്പിച്ച ദാക്ഷായണി വേലായുധനും ആ ദ്വീപുകാരിയാണ് . ദലിത് സ്ത്രീ എന്ന നിലയില് കൊച്ചിയിലും കേരളത്തിലും ഇന്ഡ്യയിലാകെയും പല ഒന്നാം സ്ഥാനങ്ങള്ക്കും ഉടമയാണ് , ബൗദ്ധിക പെണ് കരുത്തിന്റെ പ്രതീകമായ ആ അധ്യാപിക . നിയമസഭയിലും പുറത്തും കൊച്ചിയിലെ ദലിത സമൂഹത്തിനു വേണ്ടി പൊരുതിക്കയറിയ കെ . പി . വള്ളോനും ആ നാട്ടുകാരനാണ് . സ്വജീവിതം സഹജീവികള്ക്കു വേണ്ടി വലിച്ചെറിഞ്ഞ് അകാലത്തില് മരണം വരിച്ച് , കൊച്ചിയുടെ മനഃസാക്ഷിയില് എക്കാലത്തേയ്ക്കും വിങ്ങലായി മാറിയ വള്ളോന് . നവോത്ഥാനകാലാന്ത്യത്തില് താന്പോരിമയുടെയും ആദര്ശദാര്ഢ്യത്തിന്റെയും ആള്രൂപമായ കെ . കെ . മാധവന് മാഷും ( ദാക്ഷായണി ടീച്ചറിന്റെ സഹോദരന് ) മുളവുകാട്ടുകാരനാണ് . കേരളത്തിന്റെ സാമൂഹികവിപ്ളവ രംഗത്ത് ആദ്യ എഴുത്തുകാരനായി ഉദയം ചെയ്ത പണ്ഡിറ്റ് കെ . പി . കറുപ്പന് , അടിമവര്ഗത്തിനുവേണ്ടി പട നയിച്ചത് എറണാകുളം കരയില് ജീവിച്ചുകൊണ്ടാണ് . സാഹിത്യത്തിലെ ധീരതയും രംഗബോധവും എന്തെന്നു മലയാളത്തെ പഠിപ്പിച്ച ആ ഗുരുനാഥന്റെ കാലടി പതിയാത്ത , ആ ജീവിതവും ആ പോരാട്ട തന്ത്രങ്ങളും തൊട്ടുനില്ക്കാത്ത ഒരിടവും എറണാകുളം കരയിലുണ്ടാവില്ല . . .
ഈ കണ്ട മഹാ ജനസ്നേഹികളെ മറക്കരുത് , അവര് നിലപാടു നിന്ന മനുഷ്യവാസ കേന്ദ്രങ്ങളെ ഒരുമിപ്പിക്കുന്ന പാലത്തിനു പേരിടുമ്പോള് ( ഒരു പാലത്തിനു മാത്രം പേരിടുകയും ബാക്കി രണ്ടു പാലങ്ങളെ ഒഴിച്ചുനിര്ത്തുകയും ചെയ്ത സംഘാടകരുടെ യുക്തി എനിക്കു പിടികിട്ടുന്നില്ല ) . മാത്രമല്ല , ഒരു ചരിത്രവിദ്യാര്ഥിയെന്ന നിലയില് ഞാന് അറിയുന്ന " പുലയനയ്യപ്പ " നു ഹിതകരമാകാനിടയില്ല , തന്നോടൊപ്പം ഒരു പോരാട്ട കാലം പങ്കുവച്ചു ജനമനസ്സു കീഴടക്കിയ സഹപ്രവര്ത്തകരോട് പിന്തലമുറ കാണിക്കുന്ന ഈ പന്തിഭേദം . ( പാലങ്ങളുടെ ഉദ്ഘാടനവേളയിലും ഈ ആവശ്യം ഞാന് പത്രങ്ങള് വഴി ഉന്നയിച്ചിരുന്നു , ബധിര കര്ണങ്ങള്ക്കുവേണ്ടി ! തുടര്ന്ന് , സഹോദരന്റെ പേരുയര്ത്തി ചില കോമരങ്ങള് പിന്നാലെ രംഗത്തുവന്നതും ചൂണ്ടിക്കാട്ടി ഗോശ്രീവാദികള് എളുപ്പത്തില് ക്രിയ ചെയ്ത് " ഗോശ്രീ പാലങ്ങള് " എന്നു പേരിട്ടു രംഗം കൈയടക്കുകയായിരുന്നു എന്നുതന്നെയാണ് എന്റെ നിഗമനം . )
No comments:
Post a Comment